Müasir dövrdə gənclərin vətənpərvərlik tərbiyəsi - FOTOLAR

NUHÇIXAN İnformasiya Agentliyi xəbər verir ki, eyni adlı tədbir Naxçıvan Dövlət Universitetinin Pedaqoji fakültəsində  keçirilib.

Tədbirdə  universitetin rektoru  Elbrus İsayev  vurğulayıb ki, 30 ildir, müharibə şəraitində yaşayırıq. Son günlərdə əldə etdiyimiz nailiyyətlər, mühüm strateji əhəmiyyətli yerlərin qaytarılması Azərbaycan ordusunun nə qədər güclü olduğunu bir daha bütün dünyaya nümayiş etdirdi. Rektor Ermənilərin Cənubi Qafqazda regional müharibə yaratmaq istədiyini, ancaq buna nail ola bilməyəcəklərini vurğulayıb.

Tədbirdə çıxış edən ali təhsil ocağının  “Çağırışaqədərki hazırlıq və mülki müdafiə” kafedrasının müdiri Oktay Rzayev bildirib ki, vətənpərvərlik qəhrəmanlığın əsasını qoyan mühüm amillərdəndir.  Bu sevgi  insanda lap kiçik yaşlardan aşılanmalı, gənclərimiz tariximizi yaxşı bilməli, vətənpərvər ruhda böyüməlidir.

Sonda tədbir iştirakçıları Cəbrayıl şəhərinin və 9 kəndinin işğaldan azad edilməsi ilə bağlı nümayiş olunan videoçarxa baxıblar. Sonra tələbələr vətənpərvərlik mövzusunda şeirlər səsləndirib.

                                                                                             Telli Mustafayeva