Misirin “Asiaelyoum” informasiya agentliyi Şuşanın işğaldan azad edilməsi barədə xəbəri yayıb
Şuşa şəhərinin işğaldan azad edilməsi münasibətilə Azərbaycan Respublikasının Prezidenti, Müzəffər Ali Baş Komandan İlham Əliyevin xalqa müraciəti Misirin “Asiaelyoum” informasiya agentliyinin baş xəbəri kimi yerləşdirilib.
NUHÇIXAN İnformasiya Agentliyinin verdiyi məlumata görə, yayılan xəbərdə dövlətimizin başçısının noyabrın 8-də Şəhidlər xiyabanından xalqa etdiyi müraciəti yer alıb: “Əziz həmvətənlər, əziz bacılar və qardaşlar. Böyük fəxarət və qürur hissi ilə bəyan edirəm ki, Şuşa şəhəri işğaldan azad edildi! Şuşa bizimdir! Qarabağ bizimdir! Bu münasibətlə bütün Azərbaycan xalqını ürəkdən təbrik edirəm! Bütün şuşalıları ürəkdən təbrik edirəm!
Bu tarixi bir gündə Azərbaycan xalqına bu müjdəni vermək mənim həyatımda bəlkə də ən xoşbəxt günlərimdən biridir.
Əziz Şuşa, sən azadsan!
Əziz Şuşa, biz qayıtmışıq!
Əziz Şuşa, biz səni dirçəldəcəyik!
Şuşa bizimdir! Qarabağ bizimdir! Qarabağ Azərbaycandır!”.