ABŞ-ın Nyu-York şəhərində Zəfər və Dövlət Bayrağı günlərinə həsr olunan məlumatlandırma aksiyası keçirilib - FOTOLAR

ABŞ-ın Nyu-York şəhərində 8 Noyabr - Zəfər Günü və 9 Noyabr - Dövlət Bayrağı Gününə həsr olunan məlumatlandırma aksiyası keçirilib.

NUHÇIXAN İnformasiya Agentliyi xəbər verir ki, üzərində Azərbaycan həqiqətlərini əks etdirən Led ekranlı avtomobil “Qarabağ şikəstəsi”nin, “Bayatı Şiraz” təsnifinin sədaları altında Nyu-Yorkun Manhetten adasının mərkəzi küçə və meydanlarından - Brodveydən, Uoll Stritdən, Vaşinqton Meydan Parkından, 5-ci Avenyudan, Çambers Strit və Mərkəzi Parkdan, eləcə də strateji əhəmiyyətə malik binaların, o cümlədən BMT-nin inzibati binasının önündən keçib, dünyaca məşhur “Times” meydanında dayanıb. Aksiya Diasporla İş üzrə Dövlət Komitəsinin təşkilatçılığı ilə baş tutub.

Led ekranlarda üçrəngli dövlət bayrağımız, “Şuşa, sən azadsan!”, “Qarabağ Azərbaycandır”, “Qələbən mübarək, Azərbaycan” mesajları yer alıb, Qələbəmizin rəmzi olan Şuşanın və Xarıbülbülün, müzəffər Ordumuzun şanlı Qələbəsinin və azad olunmuş tarixi torpaqlarımızın təsvirləri əks olunub.

Nəhəng ekranlarda Azərbaycan Respublikasının Prezidenti, Ali Baş Komandan İlham Əliyevin tarixi qələbə çıxışları yayımlanıb.

Məlumatlandırma aksiyası ətrafdan keçən yerli sakinlərin və turistlərin diqqətini çəkib. Onlar ayaq saxlayıb foto və videolar çəkib, məlumat alıblar.