Beynəlxalq Münasibətlərin Təhlili Mərkəzi (BMTM) ötən il mərkəzin ekspertlərinin Azərbaycan əleyhinə əsassız iddialara qarşı cavab yazılarını dərc etməkdən imtina edən beynəlxalq institutlara dair ingilis dilində hesabat hazırlayıb.
BMTM-in mətbuat xidmətindən NUHÇIXAN İnformasiya Agentliyinə verilən məlumata görə, hesabatda vurğulanıb ki, Qərbin akademik jurnallarında azərbaycanlı ekspertlər, akademiklər və şərhçilər üçün münaqişə və regionla bağlı yazı dərc etdirmək hər zaman çətin olub və bu, 2021-ci ildə də belə olub.
Həmçinin qeyd olunur ki, 2021-ci ildə “Forbes” “Columbia Journalism Review”, “Institute for the Study of Human Rights”, “New Lines Institute for Strategy and Policy”, “Responsible Statecraft” kimi təşkilatlar Azərbaycana qarşı qərəzli yanaşmanı davam etdirərək ekspertlərin ölkəmizə dair əsassız ittihamlarla bağlı cavab yazılarının dərcindən imtina ediblər. “Bütün tərəfləri dinləmək üçün bərabər imkanlar təqdim etməli olan müxtəlif platformalar çox vaxt əks fikri inkar edir. Belə ki, Azərbaycanın mövqeyinə dözümsüzlük nümayiş etdirən qurumlar bir tərəfdən demokratik dəyərlərin müdafiəçisi olduqlarını iddia edir, digər tərəfdən isə regionla bağlı əsassız iddiaların, yanlış ifadələrin və təhrifli fikirlərin səsləndirilməsini təşviq edirlər. 30 ilə yaxın müddətdə bəzi Qərb şərhçiləri “balanslı yanaşma” oyunu oynamaqla işğalçı ilə işğala məruz qalan arasında fərq qoymadan təcavüzkarla, bir milyona yaxın qaçqın və məcburi köçkünlə üzləşən, etnik təmizləməyə məruz qalan ölkəyə eyni səviyyədə yanaşırlar”, - deyə hesabatda bildirilir.
Həmçinin bu qərəzli yanaşmanın Qərb ölkələrində liberal dairələrin ermənilərə rəğbəti və gizli xristian həmrəyliyi səbəbindən baş verə biləcəyi qeyd olunur.
Hesabatda yazıların dərcindən imtina edən beynəlxalq institutların cavab məktublarından nümunələr də yer alıb.