Tbilisidə Xocalı faciəsi ilə əlaqədar tanıtım aksiyası keçirilib - FOTOLAR
Fevralın 26-da Heydər Əliyev Fondunun və Azərbaycanın Gürcüstandakı səfirliyinin birgə təşkilatçılığı ilə “Xocalıya ədalət!” beynəlxalq məlumatlandırma kampaniyası çərçivəsində Tbilisidə tanıtım aksiyası keçirilib.
NUHÇIXAN İnformasiya Agentliyi xəbər verir ki, gün ərzində üzərində Xocalı soyqırımı və qələbəmizin rəmzlərindən ibarət məlumatlandırıcı lövhələr quraşdırılmış avtomobillər Tbilisinin mərkəzi küçə və prospektləri boyunca hərəkət edib.
Avtomobillərin üzərində quraşdırılmış elektron lövhələrdə Xocalı abidəsi, Xarıbülbül, badam gülü və “Xocalıya ədalət!” beynəlxalq məlumatlandırma kampaniyası ilə bağlı məlumat toplusu əks olunub.
Avtomobillər axşam saatlarında şəhər sakinlərinin və turistlərin daha çox toplaşdıqları küçələrdən çox aşağı sürətlə hərəkət ediblər. Əhali avtomobillərin üzərində quraşdırılmış lövhələrdəki məlumatları və rəmzləri rahat izləyə və oxuya biliblər.
Məlumatlar gürcü və ingilis dillərində olub.