Ukrayna saytında ümummilli lider Heydər Əliyevə həsr edilmiş məqalə dərc olunub
Ukraynanın “Versii” saytında həmvətənimiz, hüquq elmləri doktoru, Ukrayna Milli Aviasiya Universitetinin beynəlxalq hüquq kafedrasının professoru, Ukraynanın Əməkdar təhsil işçisi Arif Quliyevin “Heydər Əliyevin xatirəsi insanların qəlbində əbədi yaşayacaq” sərlövhəli məqaləsi dərc edilib.
NUHÇIXAN xəbər verir ki, məqalə Azərbaycan xalqının ümummilli lideri Heydər Əliyevə həsr edilib. Materialda qeyd olunur ki, on beş il bundan əvvəl – 2003-cü il dekabrın 12-də Azərbaycan xalqının ümummilli lideri Heydər Əliyev dünyasını dəyişib. Öz ölkəsi üçün nurlu bir şəxsiyyət, lider olmuş Heydər Əliyev müasir Azərbaycanın tarixinin mürəkkəb dövründə xalqa düzgün yol göstərib, onu səhvlərdən və faciələrdən xilas edib. Sağlığında Azərbaycan xalqının ümummilli lideri kimi tanınmış Heydər Əliyev dünyasını dəyişəndən sonra da xalqın rəğbət və sevgisini itirməyib. O, hər bir azərbaycanlının nəzərində təkcə ölkənin istedadlı rəhbəri kimi deyil, həm də hərtərəfli inkişaf etmiş bütöv şəxsiyyət kimi ideal olub.
Məqalədə deyilir: “Heydər Əliyev hakimiyyətdə olarkən öz xalqının həyatında taleyüklü rol oynayıb. Bu illər Azərbaycanın salnaməsində ən parlaq və məzmunlu səhifələr olub. Bu gün Azərbaycan tanınmayacaq dərəcədə dəyişib. Heydər Əliyevin ölkədə qayda yaratmağa yönəlmiş titanik fəaliyyəti neft strategiyasının inkişafı ilə paralel gedirdi. Ölkənin davamlı iqtisadi inkişaf, sosial vəhdət, milli birlik strategiyasının hazırlanmasında Heydər Əliyevin xidmətləri əvəzsizdir. Ümummilli Liderin sayəsində Azərbaycanın öz dövlətçilik yolu formalaşıb, bu yol dünya siyasət elminə “İnkişafın Azərbaycan yolu” kimi daxil olub”.
Həmvətənimizin məqaləsində deyilir: “Heydər Əliyev öz fəaliyyətinin bütün sahələrində Azərbaycan Respublikasının dövlət müstəqilliyinin qorunub saxlanmasını və möhkəmlənməsini təmin etmək prinsiplərinə əsaslanırdı. O, hakimiyyətə gəldiyi ilk dövrdən başlayaraq ömrünün sonuna qədər güclü, müstəqil, hüquqi dövlət yaradılması üzərində yorulmadan çalışıb”.
Sovet hökumətinin ali rəhbərliyində təmsil olunduğu illərdə Heydər Əliyev Ukrayna üçün də çox iş görüb. Ukraynada ona həmişə görkəmli dövlət xadimi kimi dərin ehtiram bəslənib və bu gün də belədir.
Məqalədə deyilir: “Heydər Əliyevin gördüyü işlər onun həyatının hüdudlarını aşır, bu işlər onun vəfatından sonra da davam edir. Hansı dövrdə, hansı vəzifədə çalışmasından asılı olmayaraq, Heydər Əliyev öz xalqının firavanlığı, onun mənafeyi naminə bütün imkanlardan istifadə edirdi. Buna görə də onun işləri ölməzdir, onun siyasəti dünən başa çatmayıb və bu gün də davam edir. Azərbaycanın indiki Prezidenti İlham Əliyev Ümummilli Liderin layiqli varisi kimi onun tarazlaşdırılmış, cəmiyyətin bütün təbəqələrinin mənafelərini ifadə edən siyasətini davam etdirməyə qabildir, onun sınanmış komandası və dəqiq strategiyası var. Bu gün Azərbaycan xalqı öz nailiyyətləri ilə fəxr edir, hər gün bu nailiyyətlərin sayını daha da artırır, dünya iqtisadiyyatına, dünya mədəniyyətinə öz töhfələrini verir”.