“Kargu” ilk dəfə zirehdələn başlığı ilə hədəfi vurdu - FOTOLAR

Türkiyənin milli kamikadze FPV pilotsuz uçuş aparatı “Kargu”, zirehdələn döyüş başlığı ilə həyata keçirdiyi ilk sınağında zirehli avtomobili tam dəqiqliklə vurub.

NUHÇIXAN “Anadolu” agentliyinə istinadən xəbər verir ki, daha əvvəl piyada əleyhinə döyüş başlığı ilə sahəyə daxil olan, yüksək dəqiq zərbə qabiliyyətinə malik “Kargu” FPV, zirehdələn döyüş başlığı sayəsində zirehli maşınları və qorunan hədəfləri də məhv edə biləcək. Bu da Türkiyədə ilk dəfə olaraq yerli FPV-nin zirehdələn döyüş sursatı ilə sahədə istifadə edilməsi deməkdir.

Türkiyənin STM müdafiə şirkəti tərəfindən inkişaf etdirilən dron asimmetrik müharibə mühitlərindəki dinamik təhdidlərə qarşı çəkindirici güc rolunu oynayacaq.

“Kargu” FPV 10 kilometr uçuş məsafəsi ilə kamikadze rejimində 20 dəqiqədən çox, müşahidə rejimində (sursat olmadan) 44 dəqiqə havada qalmaq imkanına malikdir. 500 metrlik missiya yüksəkliyi ilə maksimum 5500 metr yüksəkliyə qalxa bilir. Maksimum sürəti saatda 160 kilometrə çatan “Kargu” FPV, piyada əleyhinə və zirehdələn döyüş başlıqları, eləcə də fiber-optik kabel kimi faydalı yük variantları ilə təchiz edilir.