İlk “OnePlus” televizoru rəsmən təqdim edilib

Çinin "OnePlus" istehsalçısı "OnePlus TV" adlı ilk "ağıllı" televizoru rəsmən təqdim edib.
 
NUHÇIXAN "IT Zine" resursuna istinadən xəbər verir ki, televizor "4K UHD" təsvir ölçülü 55 düym diaqonallı "QLED" ekranla təchiz edilib. Bundan başqa, "NTSC" rəng əhatə dairəsi 120 faiz təşkil edir. "OnePlus TV" qurğusunun hansı prosessor əsasında işləyəcəyi barədə məlumat verilmədiyinə görə onun "MediaTek MT5670" çipi ilə təchiz olunacağı gözlənilir. Təqdimatda, həmçinin qurğunun "Android TV" əməliyyat sisteminin idarəetməsi ilə işləyəcəyi açıqlanıb.
 
Məlumata görə, rəsmən "OnePlus TV 55" adlanacaq televizor iki versiyada təklif olunacaq: "TV 55 Q1" və "TV 55 Q1 Pro". Kiçik versiya səs panelinə malik olmayacaq, digər xüsusiyyətlərə görə modellər tam oxşardır.
 
"OnePlus TV" sentyabrın 28-dən etibarən satışa çıxarılacaq. "TV 55 Q1" versiyasının qiyməti 985 dollar, "TV 55 Q1 Pro" modelinin isə 1410 dollar təşkil edəcək.